ლიკა ლაბაძე - "ცხოვრების სტილი შევიცვალე"

ლიკა ლაბაძემ, ტელეწამყვანმა და ბალერინამ, ბოლო დროს მსახიობობაც სცადა და სრულმეტრაჟიან მიუზიკლ "F5"-ში ითამაშა. სულ მალე ეკრანებზე მეორე კინოფილმიც გამოვა მისი მონაწილეობით, სახელწოდებით "ერთხელ კიევში".

- ყოველთვის მინდოდა, მსახიობობა მეცადა და ეს სურვილიც ამისრულდა. თებერვალში გამოვიდა მიუზიკლი "F5", რომელშიც ბალერინას უსიტყვო როლი მაქვს. ცოტა ხნის წინ კი გადამიღეს ფილმში "ერთხელ კიევში" - ერთ-ერთი გმირის მეუღლეს ვთამაშობ. ახალი პერსონაჟი ხასიათით ძალიან მგავს, მეუღლისგან განსხვავებით, ძლიერი პიროვნებაა. მე ქმარი არ მყავს, მაგრამ ყველაფერში მიყვარს პირველობა - როგორც ოჯახში, ისე პირად ურთიერთობებშიც. როცა ადამიანთან ურთიერთობას ვიწყებ, თავიდან დამთმობი ვარ, მერე - აღარ (იცინის).

- რა ხდება შენს პირად ცხოვრებაში?
- არაფერი. პატარ-პატარა სიახლეები, რომლებიც ნებისმიერ ქალს სიამოვნებს, რა თქმა უნდა, არის, მაგრამ მნიშვნელოვანი არაფერია.

- როგორია შენი დღის რეჟიმი?
- ხუთ საათზე ვიღვიძებ, მივდივარ ტელევიზიაში და ეთერისთვის ვემზადები, მერე კი მთელი დღე მძინავს, მომდევნო ეთერისთვის ძალებს ვიკრებ. თუ კარგად ვერ დავისვენე, ეს აუცილებლად მეტყობა ეთერში. გართობისთვის მხოლოდ შაბათ-კვირას ვიცლი. შრომას მიჩვეული ვარ - ბალერინა ვიყავი, სულ რეპეტიცია, გასტროლები და სპექტაკლები გვქონდა. არ მეგონა, ასე თუ დამავიწყდებოდა ბალეტი, არც კი მომენატრებოდა... ბევრი დაბრკოლება და ტკივილი რომ ვნახე, ეტყობა, ამის ბრალია. თან ყველა სპექტაკლში ვიცეკვე, რაზეც ნებისმიერი ბალერინა ოცნებობს... ბუნებით იდეალისტი ვარ. თავს წარუმატებელ ბალერინად არ მივიჩნევ, მაგრამ ნინო ანანიაშვილი რომ იყო, ეს ნიჭი ღვთისგან უნდა გქონდეს.

- საეთერო ჩაცმულობაზე თვითონ ზრუნავ?
- გვყავს დიზაინერი, მაგრამ თავადაც ვუხამებ საეთერო ჩაცმულობას ჩემს სამოსს. მით უმეტეს, ყოველდღე ეთერში ვარ. სისტემატურად არ ვადევნებ თვალს მოდას, მაგრამ ვცდილობ, არ ჩამოვრჩე სიახლეებს. ჩემთვის მოდა სტილის შეგრძნებაა. ადამიანს უნდა უხდებოდეს, რაც აცვია. ძალიან მრავალფეროვანი გარდერობი მაქვს. შეიძლება ვიყიდო სამოსი და დიდხანს არ ჩავიცვა, მაგრამ მიყვარს, როცა ყველაფერი მაქვს. ბევრჯერ ყოფილა, გადმომიწყვია ჩემი გარდერობი და დამითვალიერებია, რასთან რისი შეხამება შეიძლება. არ მაქვს იმის ფუფუნება, მხოლოდ ბრენდული სამოსი მეცვას. ისე კი, მიყვარს "მაიკლ კორსი", მაქვს მისი აქსესუარები, ჩანთები და სუნამო. სამწუხაროდ, ამ მარკის სუნამო აღარ გამოდის, ბოლოს 2003 წელს გამოუშვეს. იტალიაში, ერთ-ერთ მაღაზიაში აღმოვაჩინე ერთი ფლაკონი და ძალიან გამიხარდა.

- ქართველი დიზაინერებიდან ვის გამოარჩევ?
- ცოტა ხნის წინ "კიკალა ატელიეს" ფოტოსესიაში მივიღე მონაწილეობა, ახალგაზრდა დიზაინერის ლაშა ბოკუჩავას სამოსი მეცვა. მართალია, უხეში ტყავისა იყო, მაგრამ ძალიან დახვეწილი და ნოვატორული. ცოტა ხნის წინ გამოჩნდა ბაზარზე ეს დიზაინერი და უკვე ისეთ წარმატებას მიაღწია, რომ ზოგმა შეიძლება ათ წელიწადშიც ვერ მოახერხოს. კი ვამბობთ, რომ ნიჭიერები ვართ, მაგრამ მოდაში გვაკლია განათლება და, ალბათ, ყველაფერი ამის შედეგია. უცხოელი დიზაინერები წელიწად-ნახევრით ადრე ქმნიან ახალ სამოსს. ისინი მოდის ეპიცენტრში არიან, მუშაობენ, სწავლობენ და მეტი იდეაც უჩნდებათ.

- ბევრი ქალი სექსუალურ სამოსს ამჯობინებს. შენთვის კომფორტულია ასეთი ტანსაცმელი?
- ეს ჩემს ხასიათში არ ზის. "იმედის" დაბადების დღეზე მეცვა ძალიან მოკლე და გულამოღებული წითელი კაბა. ყველა მეუბნებოდა, ძალიან გიხდებაო, მაგრამ მე უხერხულად ვიგრძენი თავი (იცინის). ადამიანმა უნდა გამოაჩინოს, რაც ლამაზი აქვს და ნაკლი დაფაროს, მაგრამ სექსუალურობით ყურადღების მიქცევა არ არის აუცილებელი. იყო პერიოდი, როცა ყოველდღე მეცვა მაღალქუსლიანი ფეხსაცმელი და კლასიკური სტილის სამოსი. ახლა რომ მახსენდება, ძალიან მიკვირს, როგორ დავდიოდი ასე. თუმცა ცხოვრების სტილიც შევიცვალე და შესაძლოა, ამის ბრალია, რომ დაბალქუსლიან ფეხსაცმელებსა და უფრო სპორტულ სამოსზე გადავედი.

- პლასტიკურ ქირურგიაზე თუ გიფიქრია?
- ქალს გამუდმებით სჭირდება გარეგნობაში სიახლის შეტანა. ვფიქრობ, ზომიერად ნებისმიერის გალამაზება შეიძლება... მინდა, გავიკეთო ცხვირის პლასტიკური ოპერაცია. გადაცემაში ივა კუზანოვი მყავდა სტუმრად და ვუთხარი ამის შესახებ. მეგონა, ბატონი ივა მაინც მეტყოდა, რომ ჩემთვის ეს საჭიროა, მაგრამ უარი მითხრა. ბევრჯერ უთქვამთ ამის გამო ჩემთვის, ღმერთს ნუ სცოდავო.

- სალონს ხშირად სტუმრობთ?
- კვირაში სამჯერ დავდივარ, ძირითადად - ფრჩხილების მოსაწესრიგებლად და თმის შესაღებად. ბავშვობიდან მიწევს მაკიაჟის გაკეთება, ამიტომ განსაკუთრებულად ვუვლი სახის კანს. სახლში რომ ვბრუნდები, თავდაპირველად სახეს ვიბან, მერე კი სხვა პროცედურებს ვიტარებ, რომ კანი არ დამიზიანდეს. შინიდან მაკიაჟის გარეშე არასოდეს გავდივარ. თვალის ჩრდილს და ტონალურს მუდმივად ვისვამ. ჩემი კოსმეტიკის ჩანთა რომ ნახოთ, ყველა ფერის ტუჩსაცხს, ტონალურსა და რუჟს წააწყდებით. არ ვიცი, სად რა დამჭირდება, ამიტომ დიდ ჩანთებს ვატარებ, სადაც ყველაფრის ჩატევა შეიძლება.

- მამაკაცის ჩაცმულობას აქცევთ ყურადღებას?
- ვერ გეტყვით, ვის როგორი სამოსი მოუხდება, მაგრამ მიმაჩნია, რომ მამაკაცს უნდა ეცვას სადად და გემოვნებით. ქართველებიდან არავინ მახსენდება, უცხოელებიდან კი დევიდ ბექჰემის ჩაცმულობა მომწონს.

თამარ ბოჭორიშვილი

ყოველკვირეული გაზეთი "ყველა სიახლე"